ល្បែងជល់មាន់កំពុងតែបើកលេងយ៉ាងគគ្រឹកគគ្រេងរាល់ថ្ងៃគ្មានសមត្ថកិច្ចបង្ក្រាប
18-May-2016 | ដោយ មែន កំសត់
កណ្ដាល ៖ ល្បែងជល់មាន់កំពុងតែបើកលេងយ៉ាងគគ្រឹកគគ្រេងរាល់ថ្ងៃ ដែលមានទីតាំងស្ថិតនៅក្បែរវត្តខ្សាច់ ឃុំអរិយក្សត្រ ស្រុកល្វាឯម ខេត្តកណ្ដាល។
តាមសេចក្តីរាយការណ៍ពីប្រជាពលរដ្ឋបានឲ្យដឹងថា សង្វៀនប្រជល់មាន់ខាងលើនេះ បានបើកដំណើរការជិតមួយខែមកហើយ ឃើញមានក្រុមអ្នកញៀនល្បែងមកលេងយ៉ាងច្រើនណែនតាន់តាប់មកពី គ្រប់ទិសទីសុទ្ធតែជិះរថយន្តស៊េរីទំនើបៗ កាន់លុយពេញៗដៃ មកលេងភ្នាល់ដាក់១គូ ចាប់ពី ៥០០ដុល្លារ រហូតដល់៥០០០ដុល្លារ។ ដូច្នេះក្នុងមួយថ្ងៃមានអ្នកចាញ់ និងឈ្នះរាប់ម៉ឺនដុល្លារឯណោះ។ ប្រជាពលរដ្ឋបានបន្តឲ្យដឹងទៀតថា ម្ចាស់សង្វៀនជល់មាន់ ដែលហ៊ានបើកលេងជាចំហនេះ មានឈ្មោះ ថៃ ម៉ាប់ និងឈ្មោះ ពាង ពួក គេមានខ្សែបណ្តាញធំៗ នៅពីក្រោយជាច្រើនគឺរង់ចាំការពារជានិច្ច សូម្បីតែអាជ្ញាធរមូលដ្ឋាន មិនហ៊ានក្អកជាមួយផង ហើយតាំងពីមានល្បែងជល់មាន់នេះកាលណាមក ធ្វើឲ្យប្រជាពលរដ្ឋរស់នៅក្បែរនោះមានការព្រួយបារម្ភភ័យខ្លាច គ្រប់បែបយ៉ាង ពីព្រោះក្រុមអ្នកញៀនល្បែងទាំងនោះសម្បូរទៅដោយអ្នកមានលុយមានអំណាច ស្រែកហ៊ោកញ្ជ្រៀវទ្រហឹងអឺងកង ពេលខ្លះមានការឈ្លោះប្រកែកវាយតប់គ្នាយ៉ាងអនាធិបតេយ្យទៀតផង។
ដោយឡែកប្រជាពលរដ្ឋដែលជាពុទ្ធបរិស័ទ និងព្រះសង្ឃគង់នៅវត្តខ្សាច់បាននាំគ្នារអ៊ូរទាំថា ល្បែងជល់មាន់ ដែលបើកលេងនៅក្បែរវត្តរាល់ថ្ងៃនេះ នឹងធ្វើឲ្យព្រះពុទ្ធសាសនាអាប់ឱនធ្លាក់ចុះ អស់ដំនឿ មិនខានឡើយ ដោយសារក្រុមអ្នកញៀនល្បែងទាំងអស់នេះ។
ពួកគាត់បាននាំគ្នារង់ចាំមើលចំណាត់ការរបស់អាជ្ញាធរមានសមត្ថកិច្ច ថ្នាក់លើ ពិសេសលោក ម៉ៅ ភិរុណ អភិបាលខេត្តកណ្តាល ដែលឡើងកាន់តំណែងសព្វថ្ងៃ ហ៊ាន បិទបនល្បែងពាលាអាវ៉ាសែ ខាងលើនេះ បានដែរឬទេ។ ប៉ុន្តែបើមិនហ៊ាន ឬក៏គ្មានសមត្ថភាព ប្រជាពលរដ្ឋគ្រប់មជ្ឈដ្ឋាន ពិតជាអស់ជំនឿហើយ។
ពាក់ព័ន្ធនឹងបញ្ហាបើកសង្វៀនជល់មាន់ខាងលើនេះ លោកអធិការនគរបាលស្រុកល្វាឯម បានប្រាប់អ្នកយកព័ត៌មានថា រាល់ថ្ងៃគាត់មិនហ៊ានទៅក្បែរទីនោះឡើយ និយាយប៉ុណ្ណឹងគួរយល់ហើយ៕
ចំនួនអ្នកទស្សនា
- ថ្ងៃនេះ6811
- ម្សិលមិញ2931
- សប្តាហ៍នេះ19001
- ខែនេះ6811
- ឆ្នាំនេះ990031
- សរុប20217477